Sjálfstæðisflokkurinn stendur vörð um sovéskt efnahagskerfi í stóriðjusölu

Árni Páll Árnason skrifar um orkuauðlindir og stóriðjusovét Sjálfstæðisflokksins á vefsíðu sína:

Forystumenn stjórnarflokkanna klifa nú á því að engin stóriðjustefna sé rekin af hálfu hins opinbera og ákvarðanir um virkjanir séu teknar í frjálsum viðskiptum milli orkukaupenda og orkufyrirtækja. Þetta er tómur þvættingur. Staðreyndin er sú að Sjálfstæðisflokkurinn stendur vörð um sovéskt efnahagskerfi í stóriðjusölu.

Mogginn og evran

Fyrir jafnaðarmann einsog mig þá voru nýlegar breytingar á Morgunblaðinu virkilega skemmtilegar.  Helsta breytingin sem ég tók eftir var nefnilega sú að Staksteinar voru ekki lengur á síðustu innsíðu blaðsins.  Þannig að í stað þess að lestri blaðsins hjá mér læki með því að lesa óhróður um Ingibjörgu Sólrúnu, þá endar Moggalesturinn nú með nýjustu fréttum af sambandsmálum Britney Spears.

Það er líka einsog Staksteinar hafi mildast við þessa færslu innan blaðsins.  En í morgun virðast Staksteinar vera komnir í gamlar farið og þar birtist ansi furðulegur pistill frá ritstjórunum, þar sem vitnað er í skoðanakönnum meðal almennings á evru svæðinu:

Samkvæmt könnun, sem Financial Times lét gera telja tveir þriðju íbúa Frakklands, Ítalíu og Spánar að evran hafi haft neikvæð áhrif og helmingur Þjóðverja var sömu skoðunar. Í Frakklandi sögðu einungis 5% þeirra, sem spurðir voru, að evran hefði haft jákvæð áhrif.

Tveir þriðju Þjóðverja sögðu að þeir vildu heldur þýzka markið.

Það er óneitanlega athyglisvert að á sama tíma og þetta viðhorf virðist ríkjandi í þeim ESB-ríkjum, sem könnunin náði til hjá því fólki, sem hefur margra ára reynslu af hinum sameiginlega gjaldmiðli hefjast umræður hér um mikilvægi þess að taka upp evruna.

Það er ansi magnað Mogginn noti skoðanakönnun meðal þegna evru ríkjanna sem mótrök gegn því að á Íslandi sé talað um upptöku evrunnar.  Væri ekki nær að einblína frekar á skoðanir þeirra sem hafa vit á því hvernig aðstæður á Íslandi eru?

 Það er einfaldlega svo að bæði hagfræðingar, sem og menn úr viðskiptalífinu hafa bent á kosti evru umfram krónu.  Skoðanir fólks á evru svæðinu eru ansi flóknar.  Sumir sakna ákveðins stolts í því að eiga eigin gjaldmiðil og önnur tilfinningarök eru mjög sterk, sem meðal annars eru ein af ástæðum þess að Svíar höfnuðu Evrunni. Í þessum löndum sem Mogginn vitnar til voru einnig fyrir upptöku evru gríðarlega stórir og sterkr gjaldmiðlar sem sveifluðust ekki til við skýrslugerð danskra banka.  Einnig þurftu þegnar þessara landa ekki að búa við vaxtaokur einsog viðgengst á Íslandi.

Þessar skoðanir almennings á evru svæðinu koma okkur lítið við.  

Það er ansi hætt við því að ef að almenningi í þessum löndum væri gefinn kostur á því að velja á milli evrunnar og þess gjaldmiðils sem við hér á Íslandi notum (með tilheyrandi sveiflum og vaxtaokri) að þá yrðu niðurstöður skoðanakannarinnar sem Moggin vísar í öðruvísi.  Moggaritstjórar ættu að vita betur en að skjóta á Samfylkinguna með svo aumum rökum.

(EÖE) 

Bankarnir eru áskrifendur að peningum

Guðmundur Steingrímsson frambjóðandi Samfylkingarinnar í Suðvesturkjördæmi spyr á bloggsíðu sinni:

Hvernig geta bankar sem bjóða upp á 11 til 12 prósent raunvexti á húsnæðislánum og yfir 20 prósent vexti á yfirdráttarlánum, í stórskuldugu þjóðfélagi, annað en stórgrætt á tá og fingri?

Bankarnir eru áskrifendur að peningum. Efnahagsstefnan sem bitnar harðast á almenningi, með verðtryggingu, óðaverðbólgu, háum stýrivöxtum og þenslu, er að stórum hluta lykillinn að gróða þeirra.

Meira af Guðmundi. Hér má sjá upptöku frá því úr Íslandi í bítið í morgun þar sem Guðmundur lék Erlu Ósk Ásgeirsdóttur, formann Heimdalls og frambjóðenda Sjálfstæðisflokksins í Reykjavík afar illa svo vægt sé til orða tekið. Fólk er hvatt til að horfa á þáttinn. Spóla þarf fram á ca. 1:48 mín. til að sjá þau Guðmund og Erlu Ósk.

Pétur Blöndal varð sér til skammar

Fátækt barna og hagur þeirra var til umræðu í þinginu í gær að undirlagi Helga Hjörvars. Össur Skarphéðinsson segir Pétur Blöndal hafa orðið flokki sínum enn einu sinni til skammar í þingsal í umræðunum.

Framlag hans var aðallega að kvarta yfir því að stærðfræðilega mælikvarða á fátækt væri erfitt að finna! Óregla og fíkn foreldra var honum eiknar hugleikið. Pétur Blöndal virtist hreinlega á þeirri skoðun að fátækt væri einkum stærðfræðilegur hugarburður og helsta ástæða þess að til eru íslensk börn sem lifa undir fátæktarmörku felist í því, að foreldrarnir séu óreglufólk!

Það hlýtur að vera gleðiefni fyrir illa stadda Íslendinga - til dæmis einstæða foreldra í röðum látlaunafólks - að alþingismaður Sjálfstæðisflokksins telji erfiðleika þeirra aðallega stafa af fíkn og skorti á reglusemi. En þetta er svosem ekki í fyrsta skipti sem Pétur H. Blöndal talar á þessum nótum - einsog aldraðir og öryrkjar muna úr frægu viðtali við hann fyrir nokkrum misserum.

Líttu þér nær

Ég veit að ég er ekki einn um að finnast það fyndið að sjá frjálshyggjukonu í Sjálfstæðisflokknum kvarta yfir því í Kastljósi að fólk í Samfylkingunni sé ekki allt á sömu skoðun í öllum málum.

Sérstaklega þegar að sami einstaklingur kvartar stuttu seinna í sama viðtali yfir lögum sem ríkisstjórn Sjálfstæðisflokksins setti nýlega.

(EÖE)

Írak - enn og aftur

... í Al Jazeera má lesa um tugi þúsunda Bandaríkjamanna mótmæla stríðinu og krefjast þess að menn haldi heim nú þegar. En geta menn það? Er hægt að ráðast inn í land og hlaupa svo heim frá hlutunum í mikilli óreiðu? Hvað segir sagan frá Vietnam? Hinsvegar er ljóst af fréttum í Al Jazeera að íbúar Arabalandanna trúa því ekki að utanríkisstefna Bandaríkjanna muni breytast mikið þó Demókratar taki við völdum sbr. þessi frétt.

Skrifar Lára Stefánsdóttir á bloggsíðu sína.

Sjálfstæðisflokkur og Samfylking

Fyrir utan hið afleita nafn, þá hefur kaffibandalag stjórnarandstöðunnar virkað hálf klúðurslegt að undanförnu.  Ég hef lengi verið því fylgjandi að vinstri flokkarnir sameini krafta sína í kosningum í stað þess að berjast sín á milli um fylgi á meðan að stjórnarflokkarnir tveir halda sínu.

En vandamálið er bara að í kaffibandalaginu eru þrír flokkar.  Vinstri Grænir, Samfylkingin og svo Frjálslyndi flokkurinn.  Það er hins vegar augljóst eftir landsþing Frjálslyndra í gær að sá flokkur á litla sem enga samleið með stjórn sem að frjálslyndir jafnaðarmenn myndu vilja mynda.

Í kosningum um varaformann var hófsömustu rödd flokksins hafnað og Magnús Þór endurkjörinn varaformaður.  Svo er það augljóst eftir ræðu formanns flokksins að þeir eru að staðsetja sig sem flokk sem ætlar að nýta sér tortryggni gagnvart útlendingum til fylgisaukningar.  Með slíkum flokkum á Samfylkingin enga samleið.

---

Björn Ingi er á sinni síðu með ágætis samantekt á helstu áherslum Frjálslyndra í innflytjendamálum samkvæmt ræðu formannsins.

Flokkurinn vill stoppa flæði útlendinga til landsins gegn því sem stendur í EES samningunum.  Þeir þykjast geta gripið til neyðarúrræðis í samningnum þar sem hægt er að grípa til

"viðeigandi öryggisráðstafana ef upp koma alvarlegir, efnahagslegir, þjóðfélagslegir eða umhverfislegir erfiðleikar í sérstökum atvinnugreinum eða á sérstökum svæðum. Í fyrst lagi verða erfiðleikarnir annað hvort að vera orðnir að veruleika eða yfirvofandi, í öðru lagi eiga ráðstafanirnar að takmarkast við það sem er bráðnauðsynlegt til að ráða bót á ástandinu og loks eiga ráðstafanir sem gerðar eru vegna erfiðleika sem skapast vegna eins samningsaðila að gilda gagnvart öllum samningsaðilum."

Tilvitnun fengin af vef Björns Inga.

Hvernig í ósköpunum ætla Frjálslyndir að réttlæta það að hér á landi ríki eitthvað sérstaklega alvarlegt ástand í málefnum útlendinga?  Þvert á móti þá væru hér gríðarleg vandamál ef að hér væru engir útlendingar.  Frjálslyndir og þeirra stuðningsmenn sem kvarta yfir enskumælandi strætóbílstjórum verða hreinlega að gera sér grein fyrir að valið snýst ekki um enskumælandi eða íslenskumælandi strætóbílstjóra, heldur einfaldlega enskumæland eða enga bílstjóra.  Slíkt er ástandið á vinnumarkaðinum.

Það er augljóst að eftirlitsstofnanir EES munu aldrei samþykkja að ástandið á Íslandi verðskuldi það að taka upp þessa klausu.  Þess vegna þurfa Frjálslyndir væntanlega að segja upp EES samningnum til að ná takmörkum sínum.  Eru þeir þá tilbúnir til þess að taka til baka réttindi Íslendinga, sem geta í dag unnið í flestöllum Evrópulöndum án vandræða.

---

Það er alveg ljóst að möguleikar Samfylkingarinnar til setu í ríkisstjórn eru takmarkaðir ef að úrslit kosninga verða eitthvað í átt við skoðanakannanir að undanförnu.  Við munum ekki mynda vinstri stjórn einungis með Vinstri Grænum.  Því er það augljóst að besti og raunhæfasti möguleiki Samfylkingarinnar til setu í ríkisstjórn verður með Sjálfsæðisflokknum.

Helsta vandamálið við þá stjórn er ESB hræðsla Sjálfstæðisflokksins, en hún hefur þó eitthvað minnkað núna þegar að fólk úr viðskiptalífinu talar meira um ESB aðild.  ESB yrði hvort eð er vandamál í samstarfi við Vinstri Græna, sem af einhverjum ástæðum eru á móti ESB.  Þá verður að telja líklegra að Sjálfstæðismenn sjái að sér í ESB málum frekar en Vinstri Grænir.

(EÖE)

Trú á upplýsta umræðu

Ingibjörg Sólrún Gísladóttir formaður Samfylkingarinnar flutti ræðu á fundi flokksins í dag. Þar sagði hún Samfylkinguna hafa undanfarin misseri hafa sett stór mál á dagskrá. Lækkun matarverðs sem og evran og málefni Evrópusambandsins sem leið til að ná niður okurvöxtum og alltof háu verðlagi hér á landi.

Það liggur fyrir í skoðanakönnunum að upp undir helmingur þjóðarinnar er fylgjandi aðild að Evrópusambandinu og upptöku evrunnar. Þessi stóri hópur á að eiga sér málsvara, rödd í hinni pólitísku umræðu. Samfylkingin er sú rödd og við erum óhrædd við að setja málið á dagskrá. Umræðan hefur verið á villigötum og verum minnug þess að árið 1992 voru 60% þjóðarinnar þeirrar skoðunar að með EES samningnum myndum við missa yfirráð yfir fiskimiðunum.  Hefur það gerst? Auðvitað ekki. Samfylkingin trúir á upplýsta umræðu og mun fylgja þeirri stefnu fast eftir.

Ingibjörg Sólrún segist ekki taka þátt í þagnarbandalagi um Evrópumál

Dómur er fallinn

Dómur Hæstaréttar sannar sakleysi Baugsmanna og er jafnframt áfellisdómur yfir ákæruvaldinu. Það sem eftir stendur er staðfesting á grímulausum pólitískum ofsóknum Sjálfsstæðisflokksins og misbeitingu valds á hendur "Baugsmiðlunum". Vanþóknun forystumanna Sjálfstæðisflokksins á óstýrlæti Baugsmanna og viljaleysi til að ganga undir "verndarvæng" flokksins ýtti rannsókn málsins af stað. Kostnaður við rannsókn málsins og allur dómskostnaður er gríðarlegur, og hverjir borga brúsann vegna þráhyggju Björns og co.- nú auðvitað við landsmenn!

Sakborningar sýknaðir í Baugsmáli

VG um Fagra Ísland

Andrea Ólafsdóttir frambjóðandi Vinstri grænna í Suðvesturkjördæmi skrifar áhugaverða færslu á bloggsíðu sína um Samfylkinguna og stefnumörkun flokksins í umhverfismálum - Fagra Ísland.

MÁLEFNIÐ SIGRAÐI - ég tek samherjum í náttúruvernd opnum örmum

Ég tek opnum örmum og fagnandi nýlegri stefnumótun XS um Fagra Ísland - það er vissulega fagnaðarefni að vakningin skuli vera orðin svo mikil sem raun ber vitni, því það eykur verulega líkurnar á því að náttúran fái fyrir alvöru að njóta vafans á næstu árum þegar við störfum saman í stjórnarráðinu.  Ég tek því fagnandi að XS skuli vera að stilla saman strengi við landsbyggðarfólkið sitt eins og fram kemur hér : Um verndun jökulsánna í Skagafirði

Þessu ber að fagna og það verður gaman að sjá hvort að fleiri frambjóðendur Vinstri grænna tali á þessum nótum á komandi misserum og beini heldur spjótum sínum að Sjálfstæðisflokknum sem ekki hefur stefnu í umhverfismálum.

Landbúnaður og svínarækt

Finnur Árnason, forstjóri Haga, kemur með mjög þarft og athyglisvert innlegg inní umræðuna um landbúnað á Íslandi og hátt matarverð.

Í mínum huga er svínaframleiðsla ekkert nema iðnaður. Það er takmarkaður virðisauki fyrir þjóðarbúið að vera með þessa starfsemi hér á landi þegar þetta er að kosta neytendur jafnmikið og það er að gera. Það er fráleitt að skattleggja alla þjóðina fyrir iðnaðarframleiðslu sem skilar ekki meiru en þetta.

 

Einnig vitnar Mogginn í hann áfram:

Finnur sagði að það sama gilti um kjúklingaframleiðsluna. Það væri iðnaðarframleiðsla. Verðmunur á innlendum og erlendum kjúklingum væri mjög mikill og þar að auki væri skortur á kjúklingakjöti á markaðinum.

 

Þetta er þarft innlegg frá Finni.  Kjúklingar og svín búa nefnilega ekki á íslenskum fjöllum, heldur lifa allt sitt líf inní íslenskum verksmiðjum nálægt Reykjavík, sem eiga meira sameiginlegt með brauðframleiðslu heldur en landbúnaðarvöru einsog lambakjöti.  Einnig bendir Finnur réttilega á að það er skortur á þessari vöru á íslenskum markaði, sem gerir verndina enn fáránlegri.

Nú eru ríkisstjórnarflokkarnir hræddir við að breyta til í landbúnaðarkerfinu einsog Samfylkingin vill gera.  En það er augljóst að niðurfelling verndar á svína- og kjúklingakjöt væri frábært fyrsta skref, sem myndi hafa lítil sem engin áhrif á íslenskar sveitir, enda er þetta bara verksmiðjuvara.

Þessar vörur hafa líka verið að aukast gríðarlega í vinsældum meðal Íslendinga og það væri veruleg kjarabót fyrir íslensk heimili ef þau gætu keypt svína- og kjúklingakjöt á verðum sem líkjast þeim sem tíðkast í nágrannalöndunum.

Hætta á framleiðslu svínakjöts

Óábyrg evru umræða?

Í fréttum sjónvarps spyr fréttamaður forsætisráðherra (skrifað upp eftir minni):  

Segir það ekki eitthvað um krónuna að það megi ekki tala um hana

Og Geir svarar:  

Nei, það segir frekar eitthvað um þá sem tala þannig um hana.

Þetta er skrýtin pæling hjá herra Haarde.  Þannig að sú staðreynd að krónan flakki upp og niður við slæmt eða gott umtal segir meira um þá, sem tala um krónuna, heldur en krónuna sjálfa?!  

Og samkvæmt Geir þá er það eingöngu Samfylkingin, sem ber ábyrgð á slæmu tali um krónuna.  Þar þykir mér hann full upptekinn af okkur jafnaðarmönnum, sem er svosem ekkert nýtt.  Hann virðist  (kjósa að) gleyma utanríkisráðherra Íslands, mönnum einsog Birni Inga auk fjölda aðila í íslensku viðskiptalífi, sem hafa talað um möguleikann á því að taka upp evru.

Það er ekki hægt að kæfa umræðuna um evruna og ESB endalaust með því að kalla þá umræðu alltaf "ótímabæra" eða "óábyrga".  Það sem er óábyrgt er að Sjálfstæðisflokkurinn hefur reynt að kæfa allt tal um ESB í mörg ár með því að neita að taka þátt í umræðunni sökum þess að hún sé að þeirra mati "ótímabær".  Núna sjá hins vegar forystumenn flokksins að menn í viðskiptalífinu sætta sig ekki við þessa þögn og vilja sjá Ísland í ESB.

Það er erfitt fyrir Sjálfstæðismenn að sætta sig við þessar breytingar í þjóðfélaginu, en þeir hjálpa ekki málstað sínum með því að grípa alltaf til þess ráðs að kalla andstæðinga sína óábyrga.

Ísland á að sækja um aðild að ESB og taka upp evru.  Við í Samfylkingunni megum ekki láta þennan útúrsnúning Sjálfstæðismanna draga úr okkur kjarkinn í því að halda þessu fram til streitu.  Það eina sem er óábyrgt í þessari umræðu er að stinga hausnum í sandinn líkt og forystumenn Sjálfstæðisflokksins vilja gera.

- (EÖE) 

Dómur markaðarins

167 íslensk fyrirtæki hafa þegar fellt dóm sinn yfir hagstjórn ríkisstjórnarinnar og hafa með þessari leyfisveitingu (hvort sem hún verður nýtt eður ei) lýst vantrausti á efnahagsstjórnina og íslensku krónuna.

Er það ekki merkilegt að á Íslandi er komin upp sú staða að helstu boðberar frjálshyggju keppast nú við að fordæma fyrirtæki sem kjósa að gera upp í annarri mynt en þeirri íslensku!

Íslenska frjálshyggjan er sífellt að opinbera sig betur og betur sem innihaldslaus hentistefna smákónga í Valhöll. Að sjálfsögðu eiga frjálshyggjudrengirnir að „laissez-faire“ þegar kemur að uppgjörsmynt íslenskra fyrirtækja, þarna eru markaðsöflin að verki -ekki satt? Markaðurinn er að dæma hagstjórnina, líkt og fyrirtækin! 

Það er kominn tími til að umskrifa fyrsta boðorð frjálshyggjunnar: „þér hafið frelsi til athafna svo fremi sem það skaði ekki ímynd Davíðs Oddssonar!“ 

167 fyrirtæki hafa fengið leyfi til að gera upp í erlendum gjaldmiðli

Sala á hvalkjöti ekki enn hafin

Í viðskiptablaðinu 10. janúar s.l. er greint frá því að nú tæpum þremur mánuðum „frá því að fyrsta langreyðurin var dregin á land, er sala hvalkjöts ekki hafin.“

Í greininni firrir sjávarútvegsráðherra sig ábyrgð á málinu og segir „þetta er eins og hver önnur starfsemi, ef að afurðirnar seljast ekki eða það er ekki eftirspurn eftir vörunni, þá heldur auðvitað enginn áfram þeirri framleiðslu.“

Þarna birtist sýn sjávarútvegsráðherra á málið svart á hvítu. Gerir ráðherra sér enga grein fyrir því hvaða áhrif hvalveiðarnar hafa þegar haft á aðra útflutningsafurðir og þá álitshnekki sem land og þjóð hefur orðið fyrir í alþjóðasamfélaginu? Allt til þess að veiða nokkra hvali sem eru síðan getum ekki selt!

Hefði ekki verið lágmarkskrafa að kanna hvort markaður væri fyrir hvalkjöt áður en farið var í þetta mikla áróðursstríð af hálfu Hvals HF og markaðsskrifstofu þeirra við Skúlagötu? Ætlar sjávarútvegsráðherra algjörlega að hlaupa frá málinu eða viðurkenna að upptaka veiðanna hafi verið mistök? Mistök sem hafi að óþörfu skaðað íslensk útflutningsfyrirtæki og ferðamannaiðnaðinn svo ekki sé talað um ímynd lands og þjóðar.

 

Já, eða Nei: Eru allir í Samfylkingunni sammála um þetta mál?

Það er svo skrýtið með íslenska pólitík að aðeins einn flokkur er gagnrýndur stanslaust fyrir þá staðreynd að allir flokksmenn skuli ekki vera sammála um ákveðin málefni.  Ágætt dæmi um þetta kom fram í Silfri Egils í dag.  Þar krafðist íhaldsmaðurinn í settinu þess að Össur Skarphéðinsson svaraði fyrir það hvort að allir í Samfylkingunni væru sammála um stækkun álvers í Hafnarfirði.

Af einhverjum ástæðum virðast talsmenn annarra flokka ekki þurfa að svara slíkum spurningum.  Kjarni málsins er þessi:

1. Samfylkingin er næst stærsti stjórnmálaflokkur landsins og því eðli málsins samkvæmt rúmast þar fólk með ólíkar skoðanir.
2. Stefna Samfylkingarinnar í þessu álversmáli er að láta kjósendur í Hafnarfirði velja hvort þeir vilji stækkun álvers.
3. Það skiptir því engu máli hvort að einhverjir þingmenn eða meðlimir í Samfylkingunni séu hlynntir álveri og einhverjir á móti - íbúarnir í Hafnarfirði munu ráða!
   

Í öllum flokkum er til fólk, sem er hlynnt stækkun og á móti - en það breytir því ekki að stefna Samfylkingarinnar er ákveðin.  Dettur einhverjum í hug að spyrja Geir Haarde hvort að allir í Sjálfstæðisflokknum séu hlynntir eða á móti þeim málum, sem þeir standa fyrir í ríkisstjórn?

Kannski erum við Kratar ekki jafnmikil hjarðdýr og Sjálfstæðismenn.  Við erum gjarnari á því að láta það í ljós þegar að skoðun flokksins okkar er ólík okkar eigin skoðunum - ólíkt til dæmis þeim frjálshyggjumönnum sem virðast gleyma mörgum sínum grunngildum þegar þeir hafa fengið að setjast á þing fyrir Sjálfstæðisflokkinn.  

Við Kratar sameinumst í jafnaðarmannaflokk útaf því að við erum sammála um ákveðin grunngildi jafnaðarstefnunnar.  Það að við séum í sama flokki þýðir samt EKKI að við séum sammála um alla hluti.  Þetta er algengur misskilningur, sem er vert að leiðrétta

- (EÖE)

Fjölskyldur í ófjölskylduvænum hverfum?

Það er alveg þess virði að vísa á leiðara Jóns Kalddal í Fréttablaðinu í dag, sem fjallar um einstaklega furðulega herferð borgarstjóra Reykjavíkur, sama gamla Villa, gegn spilakassasal í Mjóddinni.

Nú þarf það svo sem ekkert að koma manni á óvart að Sjálfstæðismenn vilji hafa vit fyrir þegnum þessa lands, en það sem er einkennilegra er það hvernig Vilhjálmur skiptir höfuðborginni uppí "fjölskylduvæn" svæði og önnur svæði, sem eru þá væntanlega "ófjölskylduvæn".  Jón Kaldal talar um opnun spilakassasalarins:

Meginrök borgarstjóra gegn því framtaki eru að borgaryfirvöld vilji ekki starfsemi slíkra "ógæfukassa" í fjölskylduvænum hverfum.

Af því tilefni er rétt að spyrja hvort Vilhjálmur viti ekki að nú þegar eru reknir salir með spilakössum víða um borgina, og það í hverfum sem hingað til hafa ekki talist fjandsamlegri fjölskyldum en önnur hverfi?  Ef sú er raunin, þá má borgarstjóri taka hinn nýja og að því er virðist röggsama lögreglustjóra höfuðborgarsvæðisins, Stefán Eiríksson, sér til fyrirmyndar og fá sér göngutúr um borgina sína. 

Nú bý ég nálægt miðbæ Reykjavíkur, þar sem rekinn er spilasalur.  Það finnst Vilhjálmi allt í lagi, þar sem mitt svæði er sennilega ekki "fjölskylduvænt" í hans huga.  Það finnst mér magnað þar sem að ég er alltaf að sjá lítil börn á leikskólanum við hliðiná blokkinni minni og á æfingasvæði KR, sem er ekki langt frá mér. 

Borgarstjóri segir um þetta

Ég sannreyndi að til að banna spilakassa í söluturnum þarf að grafa mjög djúpt lögfræðilega en mun hins vegar fara yfir þessi mál heildstætt með eigendum spilakassanna og reyna að ná sátt um að þeir séu ekki settir upp í fjölskylduvænum fjölskyldukjörnum

 

(feitletrun mín)

Þessi spilasalur í Mjóddinni er fullkomlega löglegur og það er einfaldlega hræsni af borgarstjóra að vilja ekki svona "óæskilega", en fullkomlega löglega starfsemi í sínu heimahverfi bara vegna þess að hann skilgreini sitt hverfi sem "fjölskylduvænt".

Borgarstjóri þarf líka að svara fyrir það hvernig hann skilgreini ófjölskylduvæn hverfi.  Eru fjölskyldyrnar sem þar búa í minni metum hjá borgarstjóra og eiga þær fjölskyldur að sætta sig við að hvers konar starfsemi sé þar rekinn á meðan borgarstjóri haldi verndarskildi yfir þær fjölskyldur sem búi í "fjölskylduvænu" hverfunum?  Það væri gaman að heyra.

- (EÖE)

Skýring á slæmu gengi framsóknar í skoðanakönnunum?

Ingvi Hrafn, sem er við það að stofna nýjan fjölmiðil kemur með athyglisverða skýringu á lélegu fylgi framsóknar í skoðanakönnunum.  

Mér og gamla íhaldsþingmanninum bar líka saman um að Framsókn ætti 9 til 10 þingmenn,stuðningsmennirnir fyndust bara svo illa í skoðanakönnunum, væru að mjólka eða í gegningum, er Gallup hringdi.

Athyglisverð kenning! 

Við kratar erum auðvitað of uppteknir á kaffihúsum bæjarins til að svara kallinu frá Gallup.

- (EÖE)

Hinn feminíski VG

Hvers konar róttækur feministi tekur því ekki fagnandi að geta stuðlað að því að kona verði í fyrsta sinn forsætisráðherra Íslands? Tjah, formanni hins feminíska VG-flokks finnst það allavegana varla mikilvægt, sbr. ummæli hans í Kryddsíldinni um hugsanlegt forsætisráðherraefni kaffibandalagsins. Í staðinn fjasaði maðurinn um að "þeir sem ynnu stærsta sigurinn í kosningunum" ættu nú að eiga tilkall til embættisins. Frekar aumt það.

Sama dag skrifar varaformaður sama flokks undir áramótaannál á Múrnum þar sem hæðst er að endurminningum Margrétar Frímannsdóttur, eins af velheppnaðri stjórnmálamönnum síðari ára, og grínast með að hún heimfæri endurminningar Thelmu Ásdísardóttur upp á sjálfa sig. Sjúklegur húmor hjá varaformanninum og virðist varla bera þess merki að hún beri virðingum fyrir raunum Thelmu í æsku né skilji að neinu marki baráttu Margrétar fyrir auknum áhrifum innan Alþýðubandalagsins, þvert gegn vilja karlaklíkunnar.

Flokksmenn þess flokks sem þessir tveir einstaklingar eru í forsvari fyrir hreykja sér af því við hvert tækifæri að þeir séu einir flokka með stefnu í kvenfrelsismálum og raunar eini flokkurinn sem leggur áherslu á feminíska stefnu. Við gerum okkur grein fyrir því að sjálfsgagnrýni getur vafist fyrir mönnum, en er ekki tilvalið fyrir þá feminista sem hafa hugsað sér að kjósa Vinstri græna að velta því aðeins fyrir sér hvort sú stefna sé í rauninni nokkuð annað en orðin tóm?

Að þegar raunverulega reyni á, þá sé það kratahatrið sem trompi kvenfrelsið út af borðinu? 

Áfellisdómur yfir efnahagsstjórninni

Fyrr í dag lækkaði matsfyrirtækið Standard & Poor's lánshæfiseinkunn íslenska ríkissjóðsins vegna ójafnvægis á milli peningamála og ríkisfjármála hér á landi. Frá þessu er greint á heimasíðu Seðlabankans. Má rekja lækkunina beint til ósamræmis í nýsamþykktum fjárlögum annars vegar og vaxtahækkun Seðlabankans í gær hins vegar.Segir meðal annars í greiningunni:

Lækkunin endurspeglar minnkandi aðhald í ríkisfjármálum í aðdraganda þingkosninganna 2007. Breytingar við afgreiðslu fjárlaga 2007 eru þensluhvetjandi á sama tíma og brýn þörf er á að draga úr þjóðhagslegu ójafnvægi sem stafar af óhóflegri innlendri eftirspurn. Þessi þensluhvetjandi stefna er æ meira á skjön við stefnuna í peningamálum sem hefur knúið Seðlabankann til að auka enn frekar aðhald sitt, eins og hækkun stýrivaxta um 0,25 prósentur hinn 21. desember ber vitni. Þar með aukast líkur á harðri lendingu íslenska hagkerfisins, þegar dregur úr því þjóðhagslega ójafnvægi sem skapast hefur síðan útlána- og fjárfestingaþenslan hófst fyrir tveimur árum.

Koma þessar fréttir heim og saman við skýrslu Hagfræðistofnunar Háskóla Íslands, sem unnin var að beiðni Samtaka atvinnulífsins og kom út fyrr í vikunni. Eru þar gerðar alvarlegar athugasemdir við aðhaldsleysi í rekstri ríkis og sveitarfélaga og gengið svo langt að fullyrða að heppilegast væri að taka upp nýjan gjaldmiðil, þá væntanlega evruna, ef fram heldur sem horfir. Í skýrslunni er farið ítarlega yfir samspil ríkisfjármála og peningamálastjórnunar og mælir Kratabloggið hiklaust með lestri skýrslunnar fyrir áhugasama um stjórnmál og efnahagsmál. Í skýrslunni kemur eftirfarandi meðal annars fram:

Á uppgangstímum, þegar Seðlabankinn hækkar vexti, er mjög mikilvægt að ríkisfjármálin séu tekin föstum tökum og skattar hvorki lækkaðir né gripið til annarra aðgerða sem eru til þess fallnar að auka eftirspurn í hagkerfinu. Þessu hefur verið öfugt farið undanfarin ár. Tekjuskattshlutfall hefur verið lækkað og gefin fyrirheit um að tekjum vegna einkavæðingar Símans yrði ráðstafað í miklar framkvæmdir. Slík hegðan hefur eðlilega mikil áhrif á væntingar og vekur vonir um frekari uppgang og þar með eftirspurnaraukningu. Það leiðir á endanum til verðbólguþrýstings.

Efnahagsstjórn Sjálfstæðisflokksins og Framsóknarflokksins fær falleinkunn, ef tekið er mið að skýrslu Hagfræðistofnunar annars vegar og viðbrögðum erlendra matsfyrirtækja við nýsamþykktum fjárlögum og vaxtahækkunum.  Það er löngu tímabært að íslenskir fjölmiðlamenn fari að fjalla um málið af meiri festu og gagnrýni og efast um þær fantasíur íhaldsmanna að hægri mönnum sé einum treystandi fyrir ábyrgri fjármálastjórn. Öllum ætti að vera ljóst að sú mýta er varla nothæf lengur.

Lánshæfiseinkunnir ríkissjóðs lækkaðar hjá Standard & Poor's

Mörður barinn

Mörður Árnason var barinn í höfuðið af lögreglunni svo hann var vankaður á eftir.

Þetta gerðist í kjölfar mótmælastöðu fyrir utan Háskóla Íslands þegar þessi þingmaður Samfylkingarinnar var aðeins 14 ára gamall.

Frásögn af þessu atviki má finna á bls.87 í nýrri bók Guðna Th. Jóhannessonar: "Óvinir ríkisins".

Kratabloggið mælir með þessari bók sem er nauðsynleg lesning öllum sem hafa snefil af stjórnmálaáhuga.